قاریانِ ہند کے حالات، جن کو میں نے سولہ سال کی عمر سے ہوش سنبھالنے کے بعد جمع کیا تھا، وہ اب طبع ہو رہے ہیں۔ اس کتاب کے تین حصے ہیں۔حصۂ اول میں تجوید کی اہمیت، قراءتِ عشرہ کے اختلافات، اور تجوید و قراءت پر عالمِ اسلام میں شائع ہونے والی کتابوں کا مختصر ذکر ہے، تاکہ تسلسل و تواتر کی اہمیت واضح ہو جائے اور ہند میں جب سے مسلمان آئے ہیں، ان کی مساعیِ جمیلہ ادوار کی شکل میں مختصراً منظرِ عام پر آ جائیں۔
دوسرے حصے میں قراء کے انفرادی حالات کا ذکر ہے، جو مسلمانوں کی آمد سے لے کر تیرھویں صدی ہجری تک ہند کے مختلف حصوں میں کام کرتے رہے۔
تیسرے حصے میں موجودہ قراء کے حالات ہیں، جن سے میں خود مل چکا ہوں، نیز ان کی کارگزاریوں کو بچشمِ خود دیکھ چکا ہوں۔ یہ تینوں حصے یکے بعد دیگرے شائع ہوں گے، مگر رقم اور طباعت کی مشکلات کے باعث تینوں ایک ساتھ شائع نہ ہو سکے۔
میں صدر انجمنِ اسلامیہ حیدرآباد کا شکر گزار ہوں کہ انہوں نے پہلے حصے کی طباعت کی ذمہ داری لے کر میری معاونت فرمائی ہے۔ میں ان کے لیے دست بدعا ہوں کہ جس خلوص سے انہوں نے دستگیری کی ہے، اللہ تعالیٰ ان کو جزائے خیر عطا فرمائے۔ اور قارئینِ کرام بھی، جو اس سے مستفیض ہوں، صدر انجمنِ اسلامیہ کے جملہ اراکین کے لیے دعا فرمائیں۔
میں خصوصیت کے ساتھ جناب حبیب حسین باالفقیر صاحب، الحاج نیاز حسین صاحب کلکٹر وظیفہ یاب، اور جناب پروفیسر سید محمد صاحب کا ممنون ہوں کہ ان کی حوصلہ افزائی و معاونت سے یہ کام سرانجام پا سکا۔ دیگر احباب نے بھی اس میں سرگرم حصہ لیا ہے۔ اللہ تعالیٰ ان سب کو جزائے خیر عطا فرمائے۔

ما را کہ نہ آرائشِ برگے نہ نوائی است
سرمایہ اگر ہست، ہمیں دستِ دعائی است

(بیدل)

مرزا بسم اللہ بیگ